Á tólfta tímanum í gærkvöldi var lögreglunni á höfuðborgarsvæðinu tilkynnt að stolin bifreið væri á ferð í austurhluta borgarinnar. Lögreglumönnum tókst fljótlega að finna bifreiðina og voru tveir menn handteknir skammt frá bifreiðinni. Þeir voru vistaðir í fangageymslu vegna rannsóknar málsins.

Á öðrum tímanum í nótt var tilkynnt um hávaða og læti úr íbúð í austurhluta borgarinnar. Þarna hafði einn íbúanna orðið nokkuð æstur og var hann búinn að skemma innanstokksmuni þegar lögregluna bar að garði. Maðurinn var handtekinn og vistaður í fangageymslu.

Skráningarnúmer voru klippt af fjórum bifreiðum í nótt þar sem eigendum þeirra hafði láðst að greiða tryggingariðgjöld og færa þær til lögbundinnar skoðunar.