Tímaritið Filter segir að rannsókn lögreglunnar beinist nú að Skandiamanninum svokallaða en það er Stig Engström. Hann varð þjóðþekktur í tengslum við morðið því hann var eitt af fyrstu vitnunum á morðvettvanginum. En nú er hann til rannsóknar sem hugsanlegur morðingi Palme. Sænskir fjölmiðlar fjalla mikið um málið í dag enda morðið á Palme eitt umtalaðasta sakamál Svíþjóðar fyrr og síðar. Virðist sem umfjöllun Filter um tengsl Engström við morðið hafi komið flestum mjög á óvart.
Engström er sagður hafa hlotið þjálfun í meðferð skotvopna, hann var virkur í hópum sem voru andsnúnir Palme og hann hafði aðgang að skammbyssu eins og þeirri sem Palme var skotinn með.
Rannsóknarhópurinn er sagður hafa yfirheyrt fjölda manns sem tengjast Engström, þar á meðal fyrrum eiginkonu hans.
Engström starfaði hjá auglýsingastofu í Skandiahúsinu í miðborg Stokkhólms 1986. Klukkan 23.19 að kvöldi 28. febrúar stimplaði hann sig út úr vinnu í húsinu. Klukkan 23.21 var Olof Palme skotinn til bana.
Engström fékk strax viðurnefnið Skandiamaðurinn og varð þjóðþekktur. Hann kom fram í fjölmiðlum og í viðtölum og yfirheyrslum hjá lögreglunni gaf hann sig út fyrir að vera aðalvitnið í málinu. Filter segir að Engström hafi verið til rannsóknar hjá lögreglunni síðan á síðasta ári.
Fyrrum eiginkona Engström hefur staðfest við sænska fjölmiðla að lögreglan hafi yfirheyrt hana tvisvar um Engström og hafi verið kafað djúpt ofan í málin og atburðarrásina í kringum morðið á Palme.
Engström lést árið 2000 svo ljóst er að rannsókn lögreglunnar og niðurstaða verður að byggja á sterkum tæknilegum sönnunargögnum.