Nú standa yfir réttarhöld í Bretlandi yfir 32 ára breskum karlmanni. Hann er ákærður fyrir hótanir og fyrir að hvetja til hryðjuverka. Maðurinn birti færslur á internetinu þar sem hann lagði meðal annars til að stuðningsmenn öfgasamtaka múslima myndu eitra ís í stórmörkuðum. Hann birti einnig ljósmynd af Georg prins, syni hertogahjónanna, Vilhjálms og Katrínar, og birti heimilisfang skólans sem Georg sækir ásamt skuggamynd af heilögum vígamanni. Georg er þriðji í erfðaröðinni að bresku krúnunni.
„Þeir konungbornu sleppa ekki.“
Skrifaði hann meðal annars.
Maðurinn hefur áður sagt að fólk eigi að berjast og fórna blóði sínu fyrir fólkið í heimalöndum sínum. Hann hefur einnig margoft hvatt fólk til hryðjuverka eins síns liðs. Maðurinn er þekktur fyrir að hafa aðstoðað fólk, sem vill fremja hryðjuverk, með því að ráðleggja því um sprengjugerð og smíði vopna. Hann styður einnig hryðjuverkasamtökin sem kenna sig við Íslamska ríkið eftir því sem segir í ákærunni.