Þann 17. júlí 2014 var flug MH17 frá Malaysian Airlines skotið niður yfir Úkraínu. Allir þeir 298 sem voru um borð létust. Rússneskt flugskeyti var notað til að skjóta flugvélina niður. Þetta er niðurstaða hollenskrar rannsóknarnefndar sem hefur rannsakað atburðinn. Nefndin tilkynnti þetta á fréttamannafundi fyrir skömmu.

Nákvæm rannsókn á myndbandsupptökum leiddi í ljós að Buk flugskeyti var notað til að granda flugvélinni og að það kom frá rússneskri hersveit. Sky segir að Wilbert Paulissen, hjá hollensku lögreglunni, segi að flugskeytinu hafi verið skotið frá bílalest rússneskra hermanna í Kursk í Rússlandi. Rannsóknarnefndin endurgerði leið flugskeytisins með því að nota myndbandsupptökur og ljósmyndir.

Á fréttamannafundi í morgun sagði Paulissen að öll farartækin í bílalestinni hafi verið frá rússneska hernum.

Boeingt 777 flugvél Malaysian Airlines var á leið frá Amsterdam í Hollandi til Kuala Lumpur í Malasíu þegar flugskeyti hæfði hana yfir austurhluta Úkraínu.

Sjónir hollensku rannsakendanna beinast nú að 100 manns sem eru grunaðir um að hafa átt beinan þátt í málinu en nöfn þeirra hafa ekki enn verið birt.

Rannsókninni er ekki alveg lokið en er á lokastigi að sögn nefndarmanna.