Járnbrautarlest lenti í árekstri við flutningabíl nærri bænum Caluso á Ítalíu á tólfta tímanum í gærkvöldi. Lestin var á leið frá Torino til Ivrea. Lestarstjórinn lést á vettvangi og annar maður lést á sjúkrahúsi eftir að hafa verið fluttur þangað með þyrlu. Yfirvöld segja að 18 til viðbótar hafi slasast, meiðsl flestra eru talin minniháttar.
Ökumaður flutningabílsins slapp ómeiddur. Hann var á leið í nærliggjandi vöruhús en bíllinn er sagður vera með litháensk skráningarnúmer.
Hlið við lestarteinana höfðu lokast á venjulegan hátt áður en lestin kom en af einhverjum ástæðum ók ökumaður flutningabílsins í gegnum hliðin og inn á teinana. Þrír vagnar fóru af sporinu við áreksturinn.
