Lögregluyfirvöld í Bandaríkjunum og Malasíu leita nú að kaupsýslumanninum Jho Low vegna gruns um aðild að umfangsmiklu peningaþvætti. Óhætt er að segja að síðustu ár hafi verið býsna skrautleg í lífi Low sem hefur verið sagður í tygjum við stjörnur á borð við Paris Hilton og Miröndu Kerr.

Til að gera langa sögu stutta tengist málið fjárfestingasjóði í Malasíu, 1Malaysia Development Berhad Fund, eða 1MDB, sem komið var á laggirnar árið 2009 af Najib Razak, þáverandi forsætisráðherra Malasíu. Markmið sjóðsins var að blása lífi í hagkerfi Malasíu og var Low einn af stjórnendum sjóðsins ásamt æskuvini sínum, Riza Aziz, stjúpsyni forsætisráðherrans.

Sjóðurinn virðist hafa verið notaður í ýmsilegt misjafnt og er Low talinn hafa farið ansi frjálslega með fjármunina sem í honum voru. Þannig er hann sagður hafa keypt skartgripi fyrir níu milljónir Bandaríkjadala sem hann gaf fyrirsætunni Miröndu Kerr eftir skilnað hennar og Orlando Bloom. Þá hefur sjóðurinn flækst inn í peningaþvættismál sem tengist myndinni The Wolf of Wall Street, en talið er að Red Granite Pictures, sem framleiddi myndina árið 2013 og er í eigu umrædds fjárfestingasjóðs, hafi notað myndina til að þvætta peninga.

Lögregla hefur eðli málsins samkvæmt viljað ná tali af Low vegna málsins en eftir að rannsókn hófst í Malasíu hefur það reynst þrautin þyngri. Hann er horfinn frá Malasíu og hefur ekkert til hans spurst í þó nokkurn tíma. Er talið hann sé í felum í Taívan, Bangkok, Maká eða Sjanghæ. Yfirvöld í Malasíu hafa haldlagt lúxussnekkju í hans eigu – sem var innréttuð úr gulli að einhverju leyti – og þá var lagt hald á 72 skjalatöskur sem innihéldu reiðufé, skartgripi og dýrar lúxusvörur.

Óhætt er að segja að Low hafi lifað sannkölluðu lúxuslífi á undanförnum árum og umgengist fjölmargar þekktar stjörnur úr Hollywood. Má þar nefna Paris Hilton sem eyddi með honum viku á snekkju um árið og Miranda Kerr, en um tíma var uppi orðrómur um að þau ættu í ástarsambandi. Þá sat hann fyrir á myndum með Leonardo DiCaprio og var tíður gestur á síðum slúðurblaðanna vestan hafs.