Átta konur hafa stigið fram og sakað leikarann Morgan Freeman um kynferðislega áreitni eða óviðeigandi hegðun. Frá þessu greinir CNN en um er að ræða atvik sem áttu sér yfirleitt stað á tökustað.
Ein þessara kvenna taldi sig hafa landað draumastarfinu þegar hún fékk vinnu við myndina Going In Style sumarið 2015. Í myndinni fara Morgan Freeman, Michael Caine og Alan Arkin með hlutverk bankaræningja sem komnir eru af léttasta skeiði.
Konan segir að í nokkra mánuði hafi hún mátt þola áreiti af hálfu Freemans. Hún segir að hann hafi sagt óviðeigandi hluti um útlit og líkama hennar og strokið henni á óviðeigandi hátt. Þetta gerðist ítrekað og jafnvel daglega, að sögn konunnar.
„Hann reyndi að lyfta pilsinu í eitt skipti og spurði hvort ég væri í nærbuxum,“ segir konan um eitt atvikið. Hún segir að Freeman hafi aldrei tekist að lyfta pilsinu – hann hafi þó snert það og reynt að lyfta því. Konan segir að Alan Arkin hafi tekið eftir þessu í eitt skiptið og beðið Freeman að hætta. Þá hafi Freeman orðið vandræðalegur og ekki vitað hvað hann ætti að segja.
Þetta er ekki eina ásökunin eins og að framan greinir. Önnur kona sem CNN ræddi við vann við tökur á myndinni Now You See Mee árið 2012. Hún segir að Freeman hafi áreitt hana kynferðislega ítrekað á tökustað. Þá kvaðst hún vita um aðra konu sem sagði farir sínar ekki sléttar af samskiptum við leikarann. Um var að ræða athugasemdir sem vörðuðu útlit og líkamsvöxt kvennanna.
Morgan Freeman er orðinn áttræður og hann hefur um árabil verið í hópi virtustu og vinsælustu leikara Hollywood. Hann vann til Óskarsverðlauna árið 2004 fyrir besta leik í aukahlutverki fyrir myndina Million Dollar Baby. Þá hefur hann í fjögur önnur skipti verið tilnefndur til Óskarsverðlauna.