Leit að flugi MH370 frá Malaysia Airlines verður hætt í næstu viku. Þetta tilkynnti samgönguráðherra Malasíu, Anthony Loke, í gær. Það er einkafyrirtækið Ocean Infinity sem hefur leitað að vélinni síðan í janúar eftir að opinberri leit var hætt. Samningur stjórnvalda í Malasíu við Ocean Infinity hljóðaði upp á að leitað yrði í þrjá mánuði, til aprílloka. Samningurinn hefur verið framlengdur tvisvar en nú verður leitinni hætt.

„Það verða ekki fleiri framlengingar. Þetta getur ekki haldið áfram að eilífu. Bíðum til 29. maí og síðan ákveðum við hvað við gerum eftir það.“

Sagði Loke í gær.

Eins og DV skýrði frá nýlega þá telja sumir sérfræðingar engan vafa leika á að flugmaður vélarinnar hafi staðið á bak við hvarf hennar. Hann hafi framið sjálfsvíg og tekið alla farþega vélarinnar með sér í dauðann.

Martin Donal er þessarar skoðunar en hann stýrði leit að vélinni í tvö ár en hún hvarf þann 8. mars 2014 á leið frá Kuala Lumpur í Malasíu til Peking í Kína. 239 voru um borð. Rætt var við Donal í sjónvarpsþættinum 60 Minutes Australia fyrr í mánuðinum. Þar sló hann því föstu að flugmaðurinn hafi meðvitað tekið alla farþegana með sér í dauðann.

„Þetta var vel skipulagt og ígrundað og undirbúið í langan tíma.“

Sagði Donal.

Larry Vance, Kanadamaður sem hefur starfað við flugslysarannsóknir, er sömu skoðunar.

„Hann tók eigið líf. Því miður drap hann einnig alla aðra um borð. Þetta var meðvitað.“

Sagði hann í 60 Minutes Australia.

BBC segir að rannsóknarhópur áströlsku samgöngustofnunarinnar vísi þessum fullyrðingum á bug. Þar á bæ halda menn fast við þá kenningu að flugmaðurinn hafi verið meðvitundarlaus í flugstjórnarklefanum á síðustu mínútum flugsins.

Greiningar á gervihnattagögnum benda til að flugvélin hafi orðið eldsneytislaus og hafi hrapað í sunnanvert Indlandshaf vestan við Ástralíu, mörg þúsund kílómetra frá áfangastað.