Í austurhluta Finnlands, í Konnunsuo, eru nú um 100 rússneskir Vottar Jehóvar í flóttamannamiðstöð og bíða eftir að umsóknir þeirra um hæli verði afgreiddar. Fólkið flúði land eftir að trú þeirra var lýst öfgatrú og þeim var hótað fangelsisvist ef þau myndu iðka trú sína.
Það var í apríl á síðasta ári sem Vottar Jehóva voru lýstir öfgatrúarfólk í Rússlandi. Blöð, útgefin af Vottum Jehóva, voru sett á lista yfir efni sem bannað er að birta og byggingar í eigu safnaðarins voru haldlagðar af ríkinu. Vefsíðum safnaðarins hefur verið lokað og margir safnaðarmeðlimir hafa verið handteknir og fangelsaðir.
Í umfjöllun Finnska ríkisútvarpsins um málið er haft eftir Jaroslav Sivolskij, talsmanni Votta Jehóva í Evrópu, að grímuklæddir og vopnaðir liðsmenn öryggislögreglunnar FSB hafi ruðst inn á heimili Votta Jehóva og gert húsleitir. Þeir hafi einnig ruðst inn í hús þegar Vottar hafi safnast saman til bæna.
Um 170.000 Vottar Jehóva eru í Rússlandi og því er söfnuðurinn ekki stór þegar haft er í huga að íbúar landsins eru rúmlega 140 milljónir.
Ekki er ljóst af hverju starf Votta Jehóva hefur verið bannað og einnig er óljós af hverju söfnuðurinn er skilgreindur sem öfgatrúarhópur.