Tveir særðust í skothríð og sprengingu í Kista í norðurhluta Stokkhólm um miðnætti. Atburðarrásin er enn mjög óljós og lögreglan hefur lítið vilja segja um málið annað en að unnið sé að rannsókn og að tveir séu særðir. Ekki er vitað um alvarleika meiðsla þeirra.

Aftonbladet birti myndbandsupptöku á heimasíðu sinni en á henni má heyra um 20 skotum hleypt af. Blaðið hefur eftir talsmanni lögreglunnar að tilkynnt hafi verið um skothríð og sprengingu.

Mikill fjöldi lögreglumanna hefur verið á vettvangi í nótt. Hinir særðu voru fluttir á sjúkrahús. Lögreglan segir að málið sé rannsakað sem morðtilraun.