Rigning, rok, lægðir sem helst minna á haustlægðir en skella á að vori, kuldi og eiginlega bara hundleiðinlegt veður. Á þennan hátt minnast margir veðurfarsins í maí en það hefur ekki verið ýkja spennandi. Danir hafa líka sinn djöful að draga í þessum efnum en þar stefnir í ótrúlegt veðurfarsmet í maí.

Frá því að danska veðurstofan, DMI, hóf mælingar fyrir 145 árum er hæsti meðalhiti sem mælst hefur í maí 13,8 gráður en það var 1889 sem svo hlýtt var. En nú er ekkert annað í kortunum en að þetta met verði slegið og það hraustlega eða um allt að eina gráðu.

Veðrið hefur, að margra mati, leikið við Dani í mánuðinum en hann hefur verið mjög hlýr, sólríkur og úrkoman mjög lítil, langt undir meðaltali. Danska ríkisútvarpið hefur eftir Mikael Scharling, loftslagsfræðingi hjá DMI, að meðalhitinn í maí verði 14,6 til 14,8 gráður. Gamla metið fellur því örugglega. Meðalhitinn í maí á árunum 2006 til 2015 var 11,3 gráður svo hér er um mikla hækkun að ræða.

Samkvæmt viðmiði dönsku veðurstofunnar þá telst veðurfræðilegur sumardagur hafa náðst ef hitinn fer yfir 25 gráður einhversstaðar í landinu. Á síðasta ári gerðist það 11 sinnum, það sem af er 2018 hefur það gerst 11 sinnum!

En sólinni og hitanum fylgir ekki eintóm gleði því þurrkar eru farnir að gera vart við sig og bændur hafa áhyggjur af uppskerunni.