Eins árs stúlka lést á miðvikudaginn eftir að faðir hennar gleymdi henni í bíl fyrir utan heimili þeirra. Faðirinn hafði ekið eldra systkin stúlkunnar í leikskóla. Þegar hann kom heim aftur gleymdi hann litlu stúlkunni í bílnum og fór inn í húsið. Stúlkan var í bílnum allan daginn og það var ekki fyrr en móðir hennar kom heim um kvöldið að það uppgötvaðist að stúlkan var í bílnum. Þá var of seint að bjarga lífi hennar.
Fjölskyldan býr í útjaðri Nashville í Tennessee í Bandaríkjunum. Samkvæmt frétt The Tennessean þá var hitinn tæplega 30 gráður þar á miðvikudaginn og allt að 50 gráður í bílnum.
Lögreglan segir að hjónin hafi ættleitt stúlkuna nýlega. Hún var úrskurðuð látin við komuna á sjúkrahús. Ekki hefur verið tekin ákvörðun um hvort faðirinn verði ákærður.