Íranskur almenningur mun sjá til þess að Mike Pompeo, utanríkisráðherra Bandaríkjanna, fái gott kjaftshögg segir einn af æðstu yfirmönnum íranska byltingarvarðarins. Þessi ummæli féllu í kjölfar tilkynningar Pompeo nýlega um að Bandaríkin muni nú taka upp hörðustu refsiaðgerðir sögunnar gegn Íran. Pompeo sagði að Íran muni ganga í gegnum erfiða tíma og að öllum aðgerðum þeirra verði mætt af mikilli staðfestu Bandaríkjanna.

Ismail Kowsari, næstæðsti yfirmaður byltingarvarðarins, sagði í kjölfarið að Íranir muni standa saman gegn þessu og svara með góðu kjaftshöggi á Pompeo og aðra sem styðja Bandaríkin.

Pompeo sagði að kjarnorkusamningurinn við Íran hafi verið stór mistök sem stefni friði í Miðausturlöndum í hættu. Frá því að skrifað var undir samninginn 2015 hafi Íranir valsað í gegnum Miðausturlönd og það hafi haft neikvæð áhrif. Hann sagði að Bandaríkin muni grípa til harðra refsiaðgerða og að Íranir verði að uppfylla 12 kröfur Bandaríkjanna til að sleppa við þessar refsiaðgerðir. Meðal þess er að Íranir dragi sig frá Sýrlandi og Jemen, hætti að auðga úran, sleppi bandarískum gíslum sem gíslum bandamanna Bandaríkjanna, hætti þróun kjarnorkueldflauga og viðurkenni hvert markmiðið með upphaflegu kjarnorkuáætlun Írans var.