Um klukkan hálf eitt í nótt var lögreglunni á höfuðborgarsvæðinu tilkynnt að menn með járnkylfur væru að reyna að komast inn í hús í austurborginni. Tilkynnandi sagði að mennirnir hefðu ekki beitt kylfunum. Mennirnir voru farnir af vettvangi þegar lögreglan kom þangað. Skömmu síðar var einn maður, sem tengist málinu, handtekinn eftir að lögreglumenn sáu hann henda meintum fíkniefnum frá sér. Hann var látinn laus að yfirheyrslu lokinni.

Um klukkan hálf eitt var maður handtekinn  í miðborginni. Hann hafði verið til vandræða á skemmtistað og hafði reynt að slá dyraverði. Maðurinn róaðist þegar lögreglan kom á vettvang og var hann settur í lögreglubifreið og átti að aka honum heim. En þegar ekið var af stað æstist maðurinn mikið og varð hinn versti í viðmóti og veittist að lögreglumanni. Hann endaði því í fangageymslu.

Um klukkan hálf eitt var bifreið ekið á ljósastaur í Hafnarfirði. Fimm voru í bifreiðinni. Tveir voru fluttir á slysadeild en ekki er vitað hversu alvarleg meiðsli þeirra voru.

Tveir ökumenn voru handteknir undir morgun en þeir eru báðir grunaðir um ölvun við akstur.