YouTube-stjarnan John Peter Bain, sem var best þekktur undir nafninu TotalBiscuit, er látinn, 33 ára að aldri. Banamein hans var krabbamein sem fyrst greindist í þörmum árið 2014. Frá þessu greindi eftirlifandi eiginkona hans, Genna Bain, á Twitter.
John, sem var Breti, tilkynnti á síðasta ári að krabbameinið hefði dreift sér og væri komið í lifrina og hrygginn. Það var svo í síðasta mánuði að ljóst var í hvað stefndi en þá hafði lyfjagjöf ekki borið tilætlaðan árangur.
John var einn vinsælasti tölvuleikjagagnrýnandi YouTube og voru áskrifendur að síðunni hans um 2,2 milljónir talsins.