Fimmtíu og fjögurra ára gömul áströlsk kona, Maria Elvira Pinto Exposto, hefur verið dæmd til dauða fyrir fíkniefnasmygl í Malasíu. Maria þessi var tekin með rúmt kíló af metamfetamíni á alþjóðaflugvellinum í Kuala Lumpur árið 2014.
Maria var á leið frá Sjanghæ í Kína til Ástralíu þegar hún millilenti í Malasíu. Í desember síðastliðnum var hún sýknuð af brotinu en áfrýjunardómstóll hefur nú snúið þeim dómi við.
Dauðarefsingar eru löglegar í Malasíu og er þeim jafnan beitt þegar um er að ræða stór fíkniefnamál. Var Maria dæmd til hengingar.
Maria hélt því fram að hún hefði verið svikin á netinu af einstaklingi sem kallaði sig Daniel Smith. Smith þessi sagðist vera bandarískur liðsforingi og segir Maria að hann hafi biðlað til hennar að fara til Kína með pappíra. Á leiðinni til baka hafi vinur þessa Daniels látið hana hafa bakpoka og hún hafi verið grunlaus um að hann innihéldi fíkniefni.
Maria hefur einn möguleika til að áfrýja dómnum en ef sú áfrýjun ber ekki árangur verður Maria að öllum líkindum tekin af lífi. Þrír Ástralir hafa verið teknir af lífi í Malasíu fyrir fíkniefnabrot, allt karlmenn, en það gerðist síðast árið 1993.