En nú er foreldrum barnungra fórnarlamba fjöldamorðs í Sandy Hook grunnskólanum í Newtown í Connecticut nóg boðið. Sex foreldrapör og einn liðsmaður alríkislögreglunnar FBI hafa nú stefnt Jones fyrir meiðyrði. Þau stefna honum fyrir að hafa árum saman dreift lygum um að fjöldamorðið í skólanum hafi aldrei átt sér stað. Það var 2012 sem 26 manns, þar af 20 börn á aldrinum 6 og 7 ára, voru skotin til bana í skólanum.
Jones hefur haldið því fram að stjórnvöld hafi sett þetta allt á svið til að fá ástæðu til að herða vopnalöggjöfina og leggja hald á skotvopn Bandaríkjamanna. Hann segir að foreldrarnir séu leikarar, börnin hafi ekki dáið og viðtöl CNN við fjölskyldur fórnarlambanna hafi verið fölsuð.
Lögsóknin er ekki bara tilkomin vegna þess að foreldrarnir eru þreyttir og sárir yfir að vera beðnir um að sanna að börn þeirra séu dáin. Í útvarpsþætti sínum hefur Jones hvatt hlustendur sína til að fara sjálfir á vettvang og rannsaka málið. Þetta hefur haft í för með sér að ókunnugt fólk hefur veist að foreldrunum á götu úti og við leiði þeirra.
Að öllu jöfnu myndi áhuginn á samsæriskenningum sem þessari fjara út með tímanum en í kjölfar þess að Donald Trump, þáverandi forsetaframbjóðandi, mætti í viðtal hjá Jones og hrósaði honum fór allt á flug á nýjan leik.
Foreldrarnir hafa nú fengið nóg og mun lögsóknin skera úr um hversu langt tjáningarfrelsið nær í Bandaríkjunum. Foreldrarnir telja að að það sé ekki ótakmarkað fyrir mann sem ljúgi vísvitandi til að græða peninga og sé vel meðvitaður um að hann sé að ljúga.
Dómstólar hafa ekki enn ákveðið hvort málið verði tekið fyrir.
