Sænskir lögreglumenn skutu mann við lögreglustöðina í Täby, sem er norðan við Stokkhólm, um klukkan 6 í morgun. Maðurinn hafði í hótunum við lögreglumenn en hann var vopnaður haglabyssu, með hjálm á höfði, í skotheldu vesti og sagðist vera með sprengjubelti.

Aftonbladet skýrir frá þessu. Maðurinn var skotinn fyrir utan lögreglustöðina og hæfðu lögreglumenn hann í fótleggina. Hann var fluttur á sjúkrahús og er ekki í lífshættu. Aftonbladet segist hafa heimildir fyrir að maðurinn hafi sagt að hann væri með sprengjubelti en lögreglan hefur ekki viljað staðfesta það. Sprengjusérfræðingar lögreglunnar eru nú á vettvangi að rannsaka hlut sem maðurinn var með.