Góðar fréttir fyrir þá sem vilja endurlifa tíunda áratug síðustu aldar en Nintendo 64 leikjatölvan er væntanlegt aftur á markað í smækkaðri mynd, Sony er einnig að vinna í endurgerð á upprunalegu PlayStation leikjatölvunni. Æði fyrir tíunda áratugnum er í fullum gangi, til marks um það eru tvær útvarpsstöðvar hér á landi sem sérhæfa sig í að spila tónlist frá tíunda áratugnum, FlassBakk og FMX klassík. Æðið er alþjóðlegt og seldust upp á mettíma endurgerðir af fyrstu leikjatölvum Nintendo. Tölvurnar sem voru opinberlega framleiddar ef Nintendo er með innbyggðum leikjum og því gátu margir ekki fundið sinn uppáhaldsleik. Hafa margir brugðið á það ráð að opna tölvuna og nota ráð af netinu til að koma sínum leik í vélina.
Vefsíðan Japanese Nintendo, sem fylgist með tölvurisanum, tók eftir því að fyrirtækið er búið að endurskrá einkaleyfi sitt á N64 tölvunni og nokkrum leikjum, þar á meðal Star Fox, F-Zero, Pikmin, Yoshi’s island, Sin & Punishment, The Legendary Starfy, Nintendogs og Link’s Crossbow Training. Nintendo hefur ekkert sagt um fyrirætlanir sínar en allt bendir til að mini-útgáfa af N64 sé væntanleg. Það gæti þó orðið einhver bið í tölvuna þar sem leikurinn Goldeneye 007 er í eigu Microsoft og eins og þeir sem spiluðu N64 grimmt á sínum tíma þá tekur það því varla að gefa hana út nema Goldeneye sé með.
John Kodera, yfirmaður PlayStation-mála hjá Sony, viðurkenndi í samtali við vefsíðuna Comic Book að verið sé að vinna í mini-útgáfu af upprunalegu gráu PlayStation leikjatölvunni. Leikir úr PS1 eru þegar til sölu á PlayStation Store til að spila í PlayStation 4 en Sony hefur gert lítið til að auglýsa það. Sagði Kodera að verið sé að vinna í að taka saman hugsanlega leiki, en líkt og hjá Nintendo eru margir af vinsælustu leikjunum í eigu þriðja aðila sem þarf að semja sérstaklega við til að hafa þá með.