Danska námslána- og styrktarkerfið þykir mörgum vera það besta á Norðurlöndunum en samkvæmt því fá námsmenn ákveðna upphæð í styrk frá hinu opinbera í hverjum mánuði og geta síðan fengið meira fé með því að taka námslán, svokallað SU-lán, til viðbótar. Danmörk er vinsælt land til að stunda nám í og styrkjum og lánum til útlendinga hefur fjölgað töluvert á undanförnum árum.
Það setur þó svartan blett á þetta að margir námsmenn flytja til heimalandsins að námi loknu og greiða síðan ekki námslánið til baka. Þetta hefur að vonum farið illa í Dani sem telja sig vera að greiða með námi útlendinga með þessu.
Það hefur reynst erfitt og þungt í vöfum að innheimta þessi lán ef lántakendurnir eru ekki reiðubúnir til að greiða þau af fúsum og frjálsum vilja og nú hafa Danir fengið hinar Norðurlandaþjóðirnar í lið með sér til að auðvelda innheimtuna.
Jótlandspósturinn hefur eftir Lars Løkke Rasmussen, forsætisráðherra Danmerkur, að hann sé mjög ánægður með að norrænu forsætisráðherrarnir hafi handsalað ákvörðun um að gerður verði samningur sem hjálpar Norðurlöndunum við að innheimta útistandandi námslán þvert á landamæri.
Erlendir námsmenn skulda danska ríkinu nú 155 milljónir danskra króna í námslán. Þar af skulda útlendingar, sem ekki búa lengur í Danmörku, 80 milljónir og hækkaði sú upphæð um 20 milljónir á síðustu tveimur árum.