Eftir um ár tekur bann við reykingum á lóðum sjúkrahúsa og skóla og nærri leikvöllum gildi í Wales. Þar hefur verið ólöglegt að reykja í opinberum byggingum frá 2007 en nú verður gengið skrefinu lengra. Wales verður fyrsta svæðið í Bretlandi sem gengur svona langt í reykingabanni.

Vonast er til að bannið verði til þess að börn og unglingar verði minna vör við reykingar og byrji því síður að reykja. Einnig er markmiðið að hlífa fólki við óbeinum reykingum.

Til að styðja við lögin og framkvæmd þeirra verður hægt að sekta þá sem brjóta gegn banninum. Sky hefur eftir Vaughan Gething, heilbrigðisráðherra Wales, að mikil viðhorfsbreyting hafi orðið til reykinga frá 2007. Þá hafi margir verið andvígir reykingabanni en síðan hafi orðið mikil breyting á viðhorfi fólks. Það sé því ánægjulegt að yfirgnæfandi meirihluti almennings styður hertar reglur.