Það er ljóst að ekki fór allt fram eftir bókinni í Bremen þegar kom að því að afgreiða umsóknir flóttamanna um hæli í Þýskalandi. En enn er ekki alveg ljóst hvað var í gangi í borginni en yfirmaður hjá innflytjendayfirvöldum í borginni liggur undir grun um spillingu og svik í tengslum við umsóknirnar. Þrír lögmenn og einn túlkur liggja einnig undir grun um að hafa tekið þátt í öllu saman.

Að minnsta kosti 1.200 hælisumsóknir frá 2013 til 2016 tengjast málinu. Der Spiegel hefur eftir einum umsækjendanna að hann hafi greitt lögmanni 1.000 evrur í reiðufé fyrir að fá hæli. Það hafi innflytjendayfirvöld í Bremen veitt honum nokkrum mánuðum síðar.

Nýlega sagði forstjóri innflytjendayfirvalda í Þýskalandi að innri rannsókn hafi leitt í ljós að skoða þurfi 4.568 mál betur en grunuðu lögmennirnir tengjast þeim öllum. 1.500 af málunum eru frá Bremen. Í um 40 prósent af málunum frá Bremen höfðu vinnureglur verið svo þverbrotnar að væntanlega verða hælisveitingarnar dregnar til baka. Þetta hefur leitt til þess að nú á að fara yfir allar þær 18.000 hælisveitingar sem innflytjendayfirvöld í Bremen hafa veitt frá 2000.

Horst Seehofer, innanríkisráðherra, hefur gert það ljóst að málið muni hafa afleiðingar. Í gær tilkynnti ráðuneytið að innflytjendayfirvöld í Bremen hafi verið svipt leyfi til að taka ákvarðanir um hælisumsóknir.