Berlinah Wallace, 48 ára kona í Bristol á Englandi, hefur verið dæmd í minnst tólf ára fangelsi fyrir fólskulega árás á kærasta sinn haustið 2015. Árásin var hrottafengin en hún hellti sýru yfir hinn 29 ára gamla Mark van Dongen.
Forsaga málsins er sú að í september 2015 reiddist Berlinah mjög þegar hún komst að því að Mark, kærasti hennar til fimm ára, hefði haldið framhjá henni. Þegar upp komst um framhjáhaldið sagðist Mark sjá eftir gjörðum sínum og tjáði hann Berlinuh að hann ætlaði að hætta að hitta hjákonu sína.
Það gerði hann þó ekki og þegar hann sagðist vilja binda endi á samband hans og Berlinuh varð fjandinn laus. Nótt eina í september árið 2015 helti Berlinah brennisteinssýru yfir Mark þegar hann lá sofandi í rúmi sínu. Um var að ræða talsvert magn en sýran er mjög ætandi og slasaðist Mark lífshættulega í árásinni.
Svo virðist vera sem árásin hafi verið skipulögð enda keypti Berlinah sýruna, sem var 98 prósent að styrkleika, skömmu áður en hún lét til skarar skríða. „Ef ég fæ þig ekki, fær engin þig,“ er hún sögð hafa sagt þegar hún hellti sýrunni yfir hann.
Mark tókst að flýja yfir til nágranna sinna þar sem hann honum tókst að segja í grófum dráttum frá því sem gerðist. Hann var síðan fluttur alvarlega slasaður á sjúkrahús og haldið sofandi í fjóra mánuði eftir árásina. Hann blindaðist á öðru auga, lamaðist fyrir neðan háls og þá þurfti að fjarlægja vinstri fótlegg hans fyrir neðan hné.
Þar sem líf Marks, sem var verkfræðimenntaður, tók gríðarlegum breytingum þetta örlagaríka kvöld ákvað hann að leita til Belgíu þar sem líknardráp eru lögleg. Hann var talinn falla undir öll skilyrði sem til þurfti og þann 2. janúar 2017 lést Mark á sjúkrahúsi í Belgíu.
Berlinah var sakfelld fyrir aðild að dauða Marks og þarf hún að afplána minnst tólf ár í fangelsi. Hún var þó sýknuð af ákæru um morð. „Markmið þitt var að brenna, afmynda og gera hann ófæran um að lifa eðlilegu lífi – allt í þeim tilgangi að hann gæti ekki orðið aðlaðandi í augum neinnar konu. Þetta er hrein og klár mannvonska,“ sagði dómarinn í málinu þegar dómur var kveðinn upp í Bristol í morgun.