Íbúar á austurströnd Borgunarhólms, sem er dönsk eyjan rétt undan strönd Svíþjóðar, hafa undanfarið upplifað undarlega atburði. Þeir lýsa þeim sem „skjálftum“ og „djúpum drunum“ sem berast upp úr jörðinni. Jarðfræðingar segja að engir jarðskjálftar hafi mælst á svæðinu og segjast ekki hafa neinar skýringar á hvað er á seyði.

TV2 skýrir frá þessu. Þar kemur fram að margir íbúar hafi talið að um litla jarðskjálfta væri að ræða. Þegar þetta var borið undir Jørgen Butzbach, hjá dönsku jarðfræðistofnuninni, vísaði hann því á bug. Hann sagði mjög ólíklegt að jarðskjálftar finnist á austurströnd Borgundarhólms en ekki allri eyjunni. Jarðskjálftar þar finnist á allri eyjunni sem sé „einn hlutur af jarðskorpunni“.

Hann sagðist einna helst geta giskað á að hristingurinn/skjálftarnir hafi komið úr andrúmsloftinu, hugsanlega frá flugvélum sem hafi rofið hljóðmúrinn. Talsmaður danska flughersins sagði aftur á móti að hvorki danskar né sænskar herflugvélar hafi verið á þessu svæði.

Butzbach sagðist því aðeins geta giskað á að eitthvað jarðfræðilegt hafi gerst lengra í burtu. Fræðilega séð geti þrýstingsbylgja frá atburðum austar í álfunni náð til Borgundarhólms en hann sagðist þó vera að skjóta algjörlega út í loftið með þessum orðum.