Sólskin, hiti og notalegheit utanhúss. Nú og auðvitað manstu eftir að setja sólarvörn á þig. En hvað ef þú sólbrennur samt? Þá er rétt að setja annað lag af sólarvörn á líkamann áður en farið er út að njóta sólarinnar. Þetta eru niðurstöður nýrrar danskrar rannsóknar.

Vísindamenn rannsökuðu notkun 31 Dana á sólarvörn, 15 karla og 16 kvenna á aldrinum 19 til 40 ára. Fólkið var beðið um að setja á sig sólarvörn eins og það myndi gera ef það væri að fara á ströndina. Því næst var fólkið, eitt í einu, sett inn í dimmt herbergi þar sem eina ljósið var svokallað „blacklight“ en það er ljós sem fær hvítan fatnað til að líta út fyrir að vera bláleitur.

Fólkið var síðan ljósmyndað í myrkrinu. Eftir skoðun á myndunum kom í ljós að fólkið hafði ekki sett sólarvörn á 20 prósent líkamans, það er 20 prósent af þeim hluta sem ekki var hulinn fatnaði.

Fólkið var því beðið um að setja sólarvörn á sig á nýjan leik eins og það myndi gera ef það væri á leið á ströndina. Eftir síðari umferðina voru níu prósent líkamans ósmurð.

Videnskab.dk hefur eftir Ida M. Heerfordt, sem vann að rannsókninni, að þetta sýni að fólk fari út í sólina óvitandi að það hafi skilið stór svæði líkamans eftir án sólarvarnar.

„Það kom mjög á óvart að sjá hversu mikla húð þátttakendurnir gleymdu að setja sólarvörn á í fyrri umferðinni. Það er því mjög góð hugmynd að setja tvær umferðir á ef maður vill vera vel varinn.“