Við undirritun samningsins sagði Trump að þeir hefðu átt góða stund saman og hefðu byggt upp frábært samband sín á milli. Hann lofaði að skýra frá innihaldi sáttmálans á fréttamannafundi síðar í dag.
Kim Jong-un sagði að um „sögulegan sáttmála“ væri að ræða og að nú hafi Bandaríkin og Norður-Kórea ákveðið að láta fortíðina vera fortíð og þess í stað horfa fram á veginn. Hann sagði að heimurinn muni sjá miklar breytingar og þakkaði Trump.
Trump sagði að hann muni bjóða Kim Jong-un í heimsókn til Bandaríkjanna og að „kjarnorkuafvopnun“ muni hefjast „mjög, mjög fljótlega“. Þar á hann við að Norður-Kórea afsali sér kjarnorkuvopnum sínum.
AFP segir að samkvæmt sáttmálanum skuldbindi Kim Jong-un Norður-Kóreu til að losa sig við öll kjarnorkuvopn.
