Góðgerðarsamtökin Oxfam saka frönsku lögregluna um að fara illa með flóttabörn. Lögreglan er sgöð hafa vistað allt niður í 12 ára börn í fangaklefum án matar og drykkjar. Einnig er lögreglan sökuð um að hafa klippt sóla af skóm barna og stela símkortum úr farsímum þeirra og senda börnin síðan aftur ólöglega til Ítalíu.

Í skýrslu Oxfam er meðal annars sagt frá „mjög ungri“ stúlku frá Afríku sem var neydd til að ganga aftur til ítalska landamærabæjarins Ventimiglia með 40 daga gamalt barn sitt.

Ásakanir Oxfam eru byggðar á viðtölum við flóttabörn og fleiri. Oxfam og fleiri samtök stóðu að gerð skýrslunnar. Fyrir tveimur mánuðum var franska lögreglan sökuð um að hafa falsað fæðingardaga flóttabarna til að geta meðhöndlað þau sem fullorðna og sent aftur til Ítalíu. Oxfam segist ekki hafa sannanir um líkamlegt ofbeldi en mörg börn hafi sagt að þeim hafi verið hrint og/eða öskrað á þau á tungumáli sem þau skildu ekki.

Hjá Oxfam eru menn sannfærðir um að mörg flóttabörn hafi undanfarið verið send aftur til Ítalíu af frönsku lögreglunni. Samkvæmt Dublinsáttmálanum má ekki senda þau aftur til Ítalíu. Lög ESB kveða einnig á um að flóttabörn eigi að njóta verndar.