11 manns voru lagðir inn á sjúkrahús í Danmörku og Þýskalandi í gær vegna alvarlegrar matareitrunar. Fólkið var allt með einkenni sperðileitrunar, botulinism, sem er mjög hættuleg eitrun. Móteitur er til gegn þessari eitrun en ekki reyndist nægilega mikið til af því í Danmörku og var meira mótefni því sótt í skyndingu til Osló í Noregi og Lübeck í Þýskalandi.

7 voru lagðir inn á gjörgæsludeild sjúkrahússins í Sønderborg, tveir voru lagðir inn á háskólasjúkrahúsið í Óðinsvéum og einn var fluttur á sjúkrahúsið í Flensborg í Þýskalandi en náin samvinna er á milli sjúkrahúsanna á sunnanverðu Jótlandi og sjúkrahússins í Flensborg sem er fullkomnasta sjúkrahúsið á þessu svæði. Einn var á leið í frí þegar hann veiktist og var kominn til Kaupmannahafnar og var því lagður inn á ríkissjúkrahúsið þar í borg.

Sperðileitrun er mjög sjaldgæf, að jafnaði koma tvö slík tilfelli upp á ári í Danmörku. Yfirvöld leggja nú allt kapp á að finna uppruna sýkingarinnar en ekki er vitað hvort heimagerður matur hafi valdið henni eða aðkeyptur matur en talið er víst að fólkið hafi allt borðað saman og síðan veikst í kjölfarið.

Ekstra Bladet segir að eitrunin lamin vöðva fólks. Lítið magn er ekki hættulegt en mikið magn getur orðið fólki að bana. Hún getur lamað öndunarfærin og þá þarf að setja fólk í öndunarvél.

Móteitrið barst til Danmerkur í nótt og hófst meðferð með því strax. Móteitrið gagnast ef eitrið flæðir enn um líkamann en ef það hefur sest á vöðva er ekki margt sem hjúkrunarfólk getur gert.