Í nýrri skýrslu frá bandarísku samtökunum National Safety Council létust 742 börn frá 1998 til 2017 í Bandaríkjunum eftir að þau voru skilin eftir í heitum bílum. Þetta eru að meðaltali 37 börn á ári. Þegar kafað var ofan í málin kom í ljós að í 55 prósentum tilvika höfðu foreldrar eða aðrir fullorðnir gleymt börnunum í bílnum. Í 27 prósentum málanna höfðu börnin sjálf farið inn í bílana. Í 18 prósentum tilvika höfðu foreldrar eða aðrir viljandi skilið börnin eftir í bílunum.
CNN skýrir frá þessu. Rannsóknir hafa sýnt að ef útihitinn er 30 gráður líða ekki nema tíu mínútur þar til hitinn inni í bílnum hefur hækkað um 7 gráður. Þetta getur reynst börnum banvænt því líkamar þeirra ofhitna mun hraðar en líkamar fullorðinna.
Það sem af er ári hafa að minnsta kosti 9 börn látist af þessum völdum í Bandaríkjunum.