Rútu var ekið á nokkra tónleikagesti í Hollandi fyrir stundu. Þar stendur tónlistarhátíðin Pinkpop yfir. Fjórir urðu fyrir rútunni og lést einn á vettvangi. Rútunni var síðan ekið á brott af vettvangi og leitar lögreglan nú að henni og ökumanni hennar.

Pinkpop fer fram í suðurhluta landsins. Meðal flytjenda að þessu sinni er Bruno Mars sem tróð upp í nótt en hátíðinni lauk klukkan 4. Einnig höfðu Pearl Jam og Foo Fighters komið fram.

Lögreglan hefur lokað öllum leiðum að hátíðarsvæðinu til að reyna að hafa uppi á rútunni og ökumanni hennar. Ekki er vitað hvort um ásetningsverk var að ræða.