Fyrir 28 árum kom upp eldur í ferjunni Scandinavian Star sem var á leið frá Osló í Noregi til Frederikshavn í Danmörku. 159 manns létust í eldsvoðanum í þessu 141 metra langa skipi. Hvorki dönsk né norsk yfirvöld hafa getað skorið úr um af hverju kveikt var í ferjunni eða hver kveikti í henni. En nú segjast aðstandendur nokkurra þeirra sem létust hafa ný gögn undir höndum sem varpi nýju ljósi á málið.

Þetta kemur fram í Århus Stiftstidende. Blaðið hefur skjöl undir höndum sem sýna að skipið var aðeins tryggt til og með þess dags sem það kviknaði í því. Einn ættingjanna, Mike Axdal, segist einnig vera með gögn undir höndum sem bendi til að tryggingasvik hafi verið ástæðan fyrir að kveikt var í ferjunni.

Blaðið hefur eftir Axdal að umfangsmikil gögn, sem benda til tryggingasvika, liggi fyrir í málinu en rannsóknin hafi aldrei beinst að hugsanlegum tryggingasvikum. Skjölin sýna að 7. apríl var síðasti dagurinn sem trygging skipsins var í gildi. Þetta styrkir grunsemdir Axdal um að tryggingasvik hafi verið ástæða íkveikjunnar en rannsókn leiddi í ljós að kveikt var í henni.

Axdal segist vera með hljóðupptöku undir höndum þar sem tryggingamiðlari játi nánast að kveikt hafi verið í ferjunni.

Eldsupptökin og allar kringumstæður hafa verið ágreiningsefni allt frá því að eldurinn kom upp. Um tíma var talið að nafngreindur flutningabílstjóri hefði kveikt í en síðar var fallið frá þeim ásökunum. Enginn hefur því verið dreginn til ábyrgðar fyrir þennan mannskæða eldsvoða.