Fólk sem er einhleypt, skilið eða hefur misst maka sinn er í miklu meiri hættu á að fá hjartasjúkdóma en þeir sem eru giftir eða í samböndum. Þetta eru niðurstöður nýrrar rannsóknar.

Vísindamenn frá háskólum í Bretlandi, Bandaríkjunum og Ástralíu fóru yfir niðurstöður 34 rannsókna sem voru gerðar á 52 árum. Rúmlega tvær milljónir manna á aldrinum 42 til 77 ára tóku þátt í rannsóknunum. Niðurstöðurnar sýna að þeir sem voru einhleypir, fráskildir eða höfðu misst maka sinn voru 42 prósent líklegri til að þróa með sér hjarta- og æðasjúkdóma en þeir sem voru í samböndum.

Þeir voru einnig 16 prósent líklegri til að fá kransæðastíflu og 42 prósent líklegri til að deyja af völdum hennar. Þeir voru einnig 55 prósent líklegri til að fá blóðtappa. Sky skýrir frá þessu.

Chun Wai Wong, sem stýrði rannsókninni, segir að niðurstöðurnar bendi til að það hafi forvarnaráhrif gegn hjartasjúkdómum að vera í sambandi.