Móðirin, 31 árs, og sambýlismaður hennar, 40 ára, eru ákærð fyrir að hafa nýtt sér varnarleysi stúlknanna til að beita þær ofbeldi og misþyrma þeim. Þau neita sök en ef þau verða fundin sek um ofbeldið eiga þau nokkurra mánaða fangelsi yfir höfði sér.
BT segir að samkvæmt ákærunni hafi eldri stúlkan verið lamin af móður sinni þrisvar til fjórum sinnum í mánuði þegar hún var á aldrinum þriggja til tíu ára. Yngri systir hennar var oft viðstödd ofbeldið sem fólst í hnefahöggum og að slá með flötum lófa á handleggi og fótleggi. Móðirin er einnig sögð hafa slegið hana margoft á rassinn.
Upp komst um ofbeldið í október á síðasta ári eftir að móðirin hafði lamið dóttur sína á lærið með ryksuguröri auk þess sem hún sló hana í upphandlegg með krepptum hnefa. Áverkar voru á stúlkunni eftir þetta og varð það til að starfsfólk skóla gerði barnaverndaryfirvöldum viðvart.
Móðirin er einnig ákærð fyrir að hafa beitt yngri dóttur sína svipuðu ofbeldi í þrjú ár.
Sambýlismaður hennar er ákærður fyrir að beitt eldri dótturina ofbeldi í eitt ár og að hafa nýtt sér varnarleysi hennar til að lemja hana ítrekað.
Í kjölfar afskipta barnaverndaryfirvalda af fjölskyldunni var móðurinni og stúlkunum komið fyrir í athvarfi. En það stöðvaði ekki móðurina sem réðst á eldri dóttur sína á aðfangadagskvöld og kastaði henni af öllu afli á vegg.
Réttarhöld í málinu hefjast í Næstved í vikunni.