Flest bendir til að það hafi verið átök glæpagengja sem kostuðu þrjá unga menn lífið í Malmö í gærkvöldi. Þeir voru skotnir þegar þeir komu út af internetkaffihúsi á níunda tímanum. Lögreglan vill hvorki staðfesta né neita að skotið hafi verið á mennina úr bíl.

Þetta kom fram á fréttamannafundi lögreglunnar í Malmö fyrir stundu. Stefan Sintéus, talsmaður lögreglunnar, sagði að það væri sorglegt að sjá svona unga menn deyja. Auk þeirra þriggja sem létust eru þrír særðir. Þeir eru 21, 30 og 32 ára. Ástand þeirra er sagt stöðugt en alvarlegt.

Sintéu sagði að lögreglan þekkti sexmenningana og að þeir væru og hefðu verið félagar í glæpagengi. Hann sagði einnig að sexmenningarnir hefðu þekkt hvern annan.

Hann sagði að nú væru þrjár til fjórar deilur í gangi á milli glæpagengja í Malmö og að skotárásin í gærkvöldi tengdist að öllum líkindum einhverjum þeirra.