Bandaríski rapparinn XXXTentacion var skotinn til bana síðdegis í gær í Flórída. Lögreglustjóraembættið í Boward County staðfesti þetta á Twitter og segir að kennsl hafi verið borin á fórnarlamb skotárásar í Deerfield Beach. Þar hafi Jahseh Onfroy, betur þekktur sem XXXTentacion, verið myrtur. Hann var tvítugur að aldri.

Hann var staddur í Deerfield Beach til að skoða mótorhjól. Þegar hann gekk að bíl sínum gengu tveir vopnaðir menn að honum. Að minnsta kosti annar þeirra skaut á XXXTentacion. Árásarmennirnir óku síðan á brott í svörtum jeppa.

TMZ segir að lögreglan hafi lýst eftir tveimur svörtum mönnum í tengslum við rannsókn málsins. Lögreglan telur líklegt að hér hafi verið um rán að ræða sem fór úrskeiðis.

XXXTentacion sló í gegn með laginu „Look at me!“ og síðasta plata hans náði á topp Billboard 200 listans.