Á tólfta tímanum í gærkvöldi var tilkynnt um eld í gámi við Laugaveg 178, nærri bílageymslu. Slökkvilið slökkti eldinn sem var einskorðaður við gáminn. Á sjötta tímanum í gær var maður í annarlegu ástandi handtekinn í Austurstræti en hann var sagður hafa verið að veitast að fólki. Hann var vistaður í fangageymslu.

Skömmu eftir miðnætti var akstur ökumanns stöðvaður á Geirsgötu. Bifreiðin sem hann ók reyndist vera með röng skráningarmerki og voru þau klippt af.

Um klukkan 20.00 datt kona í tröppum í Smáralind þegar hún var að koma úr kvikmyndahúsi. Hún var flutt á sjúkrahús en hún var með áverka í andliti og var líklegast handleggsbrotin.

Fimm ökumenn voru handteknir í gærkvöldi og nótt en þeir eru allir grunaður um að hafa verið undir áhrifum fíkniefna. Einn þeirra var einnig kærður fyrir of hraðan akstur, annar fyrir að hafa ekið sviptur ökuréttindum (ítrekað brot) og sá þriðji fyrir að vera ekki með ökuskírteini meðferðis. Farþegi í bifreið hans er grunaður um vörslu fíkniefna.

Tveir ökumenn voru stöðvaðir í akstri í gær þar sem þeir höfðu áður verið sviptir ökuréttindum. Annar þeirra ók ótryggðri bifreið og voru skráningarmerkin tekin af henni.