Öldungadeild kanadíska þingsins samþykkti í gærkvöldi að heimila sölu og neyslu kannabisefna. Lögin taka gildi í september og þá munu Kanadamenn geta keypt sér kannabis og notað það án þess að eiga refsingu yfir höfði sér. 52 þingmenn studdu frumvarpið en 29 voru á móti.

Varsla og neysla kannabis hefur verið ólögleg í Kanada síðan 1923 en heimilt hefur verið að nota efnið í lækningaskyni síðan 2001.

Ekki eru allir sáttir við nýju lögin og hafa þingmenn íhaldsmanna og ýmsir hópar frumbyggja lýst yfir áhyggjum af því.

Talið er að Kanadamenn hafi eytt um 6 milljörðum Kanadadala í kannabis árið 2015 eða álíka miklu og þeir eyddu í áfengi.

Samkvæmt lögunum getur fólk keypt kannabis og kannabisolíu frá viðurkenndum framleiðendum. Söluaðilar þurfa sérstakt leyfi til að selja kannabis. Einnig verður hægt að panta efnin á netinu. Fullorðnir mega vera með allt að 30 grömm af kannabis á sér á almannafæri. Matvæli, sem innihalda kannabis, verða ekki leyfð fyrr en á næsta ári til að yfirvöld geti undirbúið lagaumgjörð vegna þeirra.

Lágmarksaldur til að kaupa og nota kannabis verður 18 ár en sum fylki munu þó miða við 19 ár. Fylkin munu fara með stjórn á hvernig kannabis verður selt og hvar má reykja það og ýmsu öðru er varðar sölu og neyslu efnisins. Alríkisstjórnin hefur sett almennar reglur um hvernig á að pakka efninu, merkingar og ýmislegt er varðar sölu þess og auglýsingar.