Um klukkan 22 var bifhjóli ekið gegn rauðu ljósi á gatnamótum Geirsgötu og Tryggvagötu. Ökumaður bifhjólsins er grunaður um að hafa verið undir áhrifum áfengis og fíkniefna, að hafa ekið sviptur ökuréttindum og að vera með fíkniefni í fórum sínum. Hann var fluttur á slysadeild með sjúkrabifreið. Að aðhlynningu lokinni var hann vistaður í fangageymslu.
Klukkan 2 í nótt var tilkynnt um bílveltu á Reykjanesbraut við Kaplakrika. 5 manns voru í bílnum og voru þeir allir farnir af vettvangi þegar lögreglan kom. Lögreglumenn fundu ökumanninn og reyndist hann vera alsgáður.
Klukkan 23.30 í gærkvöldi var akstur ökumanns stöðvaður á Reykjanesbraut við Stekkjarbakka. Ökumaðurinn er grunaður um ölvun við akstur og ofbeldi gegn lögreglumönnum. Hann var vistaður í fangageymslu.
Fimm ökumenn voru handteknir í gærkvöldi og nótt grunaðir um ölvun við akstur. Tveir þeirra eru einnig grunaðir um að hafa verið undir áhrifum fíkniefna og annar þeirra er auk þess grunaður um að hafa verið með fíkniefni í fórum sínum. Þrír þeirra reyndust hafa verið sviptir ökuréttindum og einn þeirra hafði ekki öðlast ökuréttindi.