Aðgerð, sem nefndist Aðgerð þrumuveður, fór fram á vegum alþjóðalögreglunnar Interpol um allan heim í maí. Aðgerðin beindist gegn þeim sem stunda ólögleg viðskipti með dýr, kjöt, fílabein og timbur. Fjölmargir voru handteknir í aðgerðinni og hald var lagt á fjölda lifandi og dauðra dýra auk margra tonna af kjöti og timbri.

Lögreglan í 92 löndum tók þátt í aðgerðinni. Kennsl voru borin á 1.400 manns, sem eru grunaðir um ólögleg viðskipti með villt dýr, dýrahræ og timbur.

Meðal þess sem var haldlagt voru 27.000 skriðdýr, þar af 900 krókódílar, rúmlega 9.000 skjaldbökur og 10.000 slöngur. Auk þess var lagt hald á tæplega 4.000 fugla, til dæmis páfagauka, uglur, pelikana og strúta. 48 apar voru teknir í vörslu lögreglunnar, 14 kattardýr á borð við ljón og tígrisdýr. Þá fundust hræ sjö bjarndýra, þar á meðal tveggja ísbjarna.

Hald var lagt á 43 tonn af kjöti af ýmsum dýrum, til dæmis björnum, fílum, krókódílum, hvölum og sebrahestum. 1,3 tonn af fílabeini fundust og mörg tonn af timbri. Verðmætið hleypur á milljónum dollara.

Náttúruverndarsamtökin WWF telja að ólögleg viðskipti með dýr séu fjórða stærsta skipulagða glæpastarfsemin í heiminum og velti milljörðum dollara árlega.