Á miðvikudaginn undirritaði Donald Trump forsetatilskipun um að hætt verði að aðskilja börn og foreldra sem koma ólöglega til Bandaríkjanna en þær aðgerðir höfðu sætt mikilli gagnrýni og fordæmingu innanlands sem utan. Í gær var svo enn bakkað í málefnum innflytjenda þegar tilkynnt var að hætt verið að kæra alla þá ólöglegu innflytjendur sem koma með börn til landsins. Fram að þessu hafa foreldrarnir kerfisbundið verið kærðir fyrir brot gegn bandarískum lögum.

Washington Post skýrir frá þessu. Eftir að Trump hafði skrifað undir forsetatilskipunina sagði hann að ríkisstjórn hans myndi halda áfram að kæra alla ólöglega innflytjendur sem koma til Bandaríkjanna fyrir brot á bandarískum lögum en hér eftir myndu fjölskyldur að vera saman í flóttamannamiðstöðvum. í gær sagði hann að ef eitthvað yrði gefið eftir í þessu þá myndu „allir koma hingað með lítil viðhengi sín og áhlaup af áður óþekktri stærðargráðu yrði gert á landið“.

En samt sem áður fengu landamæraverðir þau fyrirmæli í gær að hætta senda foreldra, sem koma með börn yfir landamærin, fyrir dómara. Ástæðan er fyrst og fremst skortur á húsnæðisrými til að vista fjölskyldur saman. Heimildarmaður Washington Post sagði að þessu yrði hætt þar til búið væri að koma upp aðstöðu til að vista fólkið. Hann sagði þetta hafa verið ákveðið af heimavarnarráðuneytinu.

Talskona dómsmálaráðuneytisins þvertók þó fyrir að einhver breyting hefði verið gerð og að áfram verði allir kærðir sem koma ólöglega til landsins.

Þetta sýnir kannski vel þá ringulreið sem ríkir í landamæraeftirlitinu á landamærunum að Mexíkó vegna nýrrar stefnu ríkisstjórnarinnar og afturköllunar á hluta hennar.