Um 220 flóttamenn eru taldir hafa drukknað undan ströndum Líbíu á þriðju- og miðvikudag. Þar með hafa að minnsta kosti 1.000 manns drukknað í Miðjarðarhafi það sem af er ári. Flóttamannastofnun Sameinuðu þjóðanna, UNHCR, segir þetta vera skelfilegt og biður um að gripið verði til aðgerða til að koma í veg fyrir frekara manntjón.

Trébátur sökk við strendur Líbíu á þriðjudaginn. Talið er að um 100 manns hafi verið um borð. Fimm fundust á lífi og var bjargað af líbísku strandgæslunni. Sama dag sökk gúmmíbátur með 130 manns innanborðs. 60 var bjargað af sjómönnum frá Líbíu og þeir fluttir aftur til Líbíu.

Á miðvikudaginn hvarf bátur með um 50 manns innanborðs og er talið að allir hafi drukknað.

Helmingi færri hafa reynt að komast til Evrópu yfir Miðjarðarhaf í ár miðað við sama tíma í fyrr að sögn Sameinuðu þjóðanna. Frá ársbyrjun og fram í miðjan júní komu um 40.000 manns til Evrópu yfir Miðjarðarhaf en í fyrra voru það um 80.000 manns. Þá höfðu um 2.000 manns drukknað.