Það er óhætt að segja að Trump hafi beðið pólitískan ósigur þegar hann lét undan þrýstingi og bannaði þennan aðskilnað barna og foreldra. Þetta er jafnvel í fyrsta sinn sem hann hefur þurft að láta undan miklum þrýstingi síðan hann tók við embætti forseta. Traustir stuðningsmenn hans voru farnir að draga stuðning sinn við hann til baka. Þetta á við um flokksfélaga hans í repúblikanaflokknum en einnig kristna leiðtoga sem tryggja Trump stóra hópa kjósenda með því að styðja hann.
Í nóvember verður kosið til þings og óttast repúblikanar að þeir missi meirihluta sinn í báðum deildum þingsins vegna óvinsælla aðgerða forsetans á borð við þetta mál. Ljóst er að þetta mál hefur skaðað repúblikana og hefur veitt demókrötum byr í seglin og hafa þeir að vonum gengið á lagið og verið iðnir við að berja á repúblikönum vegna málsins. Skoðanakannanir sýna einnig að repúblikanar munu tapa stórt í sumum ríkjum ef kosið væri nú.
Trump hélt því ítrekað fram að það væri demókrötum að kenna að aðskilja þyrfti börn og foreldra því þeir vilji ekki styðja tillögur hans um aðgerðir í innflytjendamálum en eins og kunnugt er vill hann reisa mikinn múr á landamærunum við Mexíkó. Trump sagði ítrekað að aðeins þingið gæti breytt þessu og látið hætta þessum aðskilnaði. Í síðustu viku sagði hann að hann gæti ekki stöðvað þessa framkvæmd með forsetatilskipun en á miðvikudaginn gerði hann það samt sem áður. Þar með er ljóst að eins og svo oft áður sagði Trump ekki satt.
Trump lagði mikið að veði pólitískt með því að láta landamæraeftirlitið aðskilja börn og foreldra og nú hefur hann tapað og það stórt. Fólki mislíkaði að saklaus börn voru notuð sem vopn í baráttu hans við að fá kröfum sínum framgengt. Spurningin er hvaða langtímaáhrif þetta mál mun hafa á stuðninginn við forsetann og repúblikana.