Ein af þeim leiðum sem er hægt að fara til að minnka þann vanda sem víða er við að etja vegna mikils umferðarþunga, umferðartafa og þar með tímasóunar í bíl er að færa umferðina upp í loftið. Það ætla Þjóðverjar nú að gera í tilraunaskyni en þeir ætla að hefja tilraunir með fljúgandi leigubíla í Ingolstadt í suðurhluta landsins.

Andreas Scheuer, ráðherra samöngumála og innviða, hefur skrifað undir viljayfirlýsingu þar um ásamt fjölmörgum hlutaðeigandi aðilum, þar á meðal Airbus og Audi.

En áður en tilraunirnar hefjast þarf að gera ýmsar rannsóknir og borgarstjórinn í Ingolstadt segir að íbúarnir verði hafðir með í ráðum. Þeir verði virkir þátttakendur í rannsóknum á hvort hægt verði að gera tilraunina og hlustað verði á íbúana hvað varðar öryggismál og hljóðmengun. Hann segir að fljúgandi leigubílar séu hugsaðir sem bæting á opinberum samgöngum en eigi ekki að koma í stað þeirra.