Það að alast upp í fjölskyldu þar sem er að minnsta kosti ein stelpa veldur því að fólk verður hamingjusamara, bjartsýnna og er betra í að takast á við vandamál sín. Dætur tengja fjölskyldumeðlimi betur saman og hvetja þá til að tala um tilfinningar sínar á áhrifaríkari hátt.

Þetta er meðal niðurstaðna rannsóknar breskra vísindamanna. Tony Cassidy, prófessor við Ulster háskólann, vann að rannsókninni og hann sagði að það að eiga systur sé til mikillar hjálpar við að öðlast góða andlega heilsu.

Systur virðast hvetja meira til opinna samskipta og samstöðu innan fjölskyldunnar. Bræður virðast hafa þveröfug áhrif. Að geta rætt um tilfinningar sínar er lykilatriðið að góðri andlegri heilsu og að eiga systur styrkir þetta innan fjölskyldunnar.

Stúlkur sem eiga systur virðast einnig vera sjálfstæðari og áfjáðari í að ná árangri en þær sem eiga ekki systur. Þetta var meira áberandi hjá börnum sem eiga foreldra sem hafa skilið og gæti bent til að systur treysti mikið á hver aðra þegar foreldrarnir skilja.

Cassidy sagði að versta útkoman í rannsókninni hafi verið hjá strákum sem eiga bara bræður.

Það gæti verið vegna þess að strákar hafa náttúrulega tilhneigingu til að tala ekki um hlutina. Þegar það eru bara strákar þá snýst þetta um samsæri um að tala ekki. Stúlkurnar virðast geta brotið þetta samsæri á bak aftur.

Í rannsókninni var rætt við 571 manns á aldrinum 17 til 25 ára um fjölskyldusamsetningu þeirra og tilfinningalega vellíðan þeirra að sögn The Telegraph.

Einbirni voru yfirleitt á miðjum skalanum fyrir hamingju og bjartsýni. Liz Wright, sem vann að rannsókninni, sagði að einbirni ættu í miklum og sterkum samskiptum utan heimilisins og að það virtist sem þau hefðu eins mikinn félagslegan stuðning og þau sem ættu systkini en munurinn væri að stuðningurinn kæmi ekki frá fjölskyldunni.