Lögreglan í Los Angeles í Bandaríkjunum lagði í síðustu viku hald á rúmlega 500 skotvopn sem fundust á heimili dæmds glæpamanns í Agua Dulce. Það var ábending frá nágranna sem kom lögreglu á slóð skotvopnanna.

Húsráðandinn, Manuel Fernandez, var handtekinn vegna málsins. lögreglan leitaði á heimili hans á fimmtudaginn og fann þá 432 skotvopn. Á föstudaginn fannst 91 skotvopn til viðbótar. Fernandez á yfir höfði sér ákæru fyrir að vera með skotvopnin ólöglega í vörslu sinni og að hafa verið með árásarriffla og stór skothylkjahólf.

Í framhaldi af húsleitinni hjá Fernandez fór lögreglan til leitar á heimil konu en þar fundust 30 skotvopn. Það mál er talið tengjast vopnaeign Fernandez. Konan var ekki heima og hefur ekki fundist.

Bandaríkjamenn sem eru dæmdir fyrir svokölluð stórafbrot missa um leið rétt til að eiga skotvopn.

LA Times hefur eftir heimildarmanni innan lögreglunnar að talið sé að Fernandez virðist hafa verið að safna skotvopnum og hafi ekki haft í hyggju að nota þau við ólöglegt athæfi.