„Við ætlum ekki að hjálpa þér. Enginn mun hjálpa þér, heimskinginn þinn!“
Öskruðu piltarnir meðal annars á Dunn sem var hreyfihamlaður. Á upptökunni sést Dunn síðan hverfa undir yfirborðið og drukkna. Lík hans fannst þremur dögum síðar.
Newsweek segir að saksóknarar hafi ákveðið að enginn verði ákærður vegna málsins. Ástæðan er að sögn saksóknara að piltarnir, sem voru 14 til 18 ára þegar þetta gerðist, brutu engin lög með því að koma Dunn ekki til aðstoðar.
„Ég veit að fólki verður óglatt yfir þessum skorti á virðingu fyrir mannslífi sem unglingarnir sýndu. Við verðum bara að vona að þetta hafi verið einangrað atvik sem gerist aldrei aftur.“
Segir í tilkynningu frá Phil Archer saksóknara.
Málið vakti mikla athygli á síðasta ári, bæði í Bandaríkjunum og utanlands. Yfirvöld í Flórída brugðust við málinu með lagafrumvarpi sem gerir refsivert að koma ekki manneskju í neyð til bjargar eða hringja í viðbragðsaðila. En frumvarpið náði aldrei að komast til atkvæðagreiðslu á þingi ríkisins.
Unnusta Dunn tilkynnti um hvarf hans þegar hann skilaði sér ekki heim. Vinir hans auglýstu eftir honum á samfélagsmiðlum og sögðu hann vera húðflúraðan og haltan enn hann hafði verið skotinn í fótlegg ári áður og var haltur eftir það.
Lík Dunn fannst þremur dögum síðar en það var óþekkjanlegt en lögreglan gat borið kennsl á það á grunni húðflúranna. Nokkrum dögum síðar var vini Dunn gert aðvart um myndband sem var í dreifingu á samfélagsmiðlum en í því sást Dunn drukkna. Lögreglunni var gert aðvart og hóf hún strax rannsókn sem er nú lokið með fyrrgreindri niðurstöðu.