Fyrir um tveimur vikum hvarf Sophia Lösche, 28 ára, þegar hún var á leið frá Leipzig í Þýskalandi til Amberg sem er í Bæjaralandi. Á fimmtudaginn fann spænska lögreglan lík hennar. Flutningabílstjóri, frá Marokkó, hefur verið handtekinn á Spáni en hann er grunaður um að hafa myrt Sophia. Það var ljósmynd, sem Sophia tók, sem kom lögreglunni á spor bílstjórans.

Það var þann 14. júní sem Sophia lagði af stað en hún ætlaði að ferðast á puttanum frá Leipzig, þar sem hún bjó, til Amberg þar sem hún ætlaði að heimsækja ættingja og vini. Síðast sást til hennar um klukkan 18 um kvöldið við bensínstöð við Schkeuditz sem er við A9 hraðbrautina nærri Leipzig. Þar fór hún upp í flutningabíl Marokkómannsins og hvarf sporlaust.

Bróðir hennar tilkynnti um hvarf hennar næsta dag. Lögreglan í Leipzig lýsti strax eftir henni og skýrði frá því að Sophia hefði sést á fyrrnefndri bensínstöð þar sem hún hefði rætt við nokkra en síðan fengið far með bílstjóra sem sagðist ætla til Nürnberg. Þaðan ætlaði hún að taka lest til Amberg.

Bróðir Sophia safnaði liði og hóf leit að Sophia. Hópnum tókst að finna flutningabílstjórann sem hafði tekið Sophia upp í á bensínstöðinni. Það var hægt vegna þess að Sophia hafði tekið mynd af skráningarnúmeri flutningabílsins og sent vinkonu sinni en Bild segir að þetta hafi hún verið vön að gera. Hópurinn fékk upplýsingar hjá fyrirtækinu, sem bílstjórinn starfaði fyrir, um hver hann væri og náði símasambandi við hann.

Bílstjórinn sagði bróður Sophia að hún hefði farið úr bílnum á bensínstöð langt frá Nürnberg. Þetta fannst bróðurnum skrýtið. Hann kom þessum upplýsingum og áhyggjum sínum áfram til lögreglunnar sem rakti ferðir flutningabílsins, með aðstoð upplýsinga frá vegtollhliðum í Frakklandi og á Spáni, og bað síðan spænsku lögregluna um aðstoð. Hún handtók manninn nærri Jaén í Andalúsíu þann 19. júní.

Skömmu fyrir handtökuna kviknaði í flutningabílnum sem maðurinn ók. Lögreglan telur að bílstjórinn hafi kveikt í honum til að reyna að eyða sönnunargögnum.

Við yfirheyrslur viðurkenndi bílstjórinn að hafa myrt Sophia og að hafa skilið lík hennar eftir nærri Asparrena á Spáni. Á fimmtudag í síðustu viku fann lögreglan síðan lík Sophia nærri bensínstöð hjá Asparrena.

Þýska lögreglan telur að Sophia hafi verið myrt á hvíldarstæði við hraðbraut í Oberfranken í Þýskalandi. Lögreglan telur að hún hafi verið myrt nokkrum klukkustundum eftir að hún fékk far með bílstjóranum. Hann er síðan talinn hafa ekið með lík hennar um borð í bílnum í þrjá daga áður en hann losaði sig við það. Þýska lögreglan hefur farið fram á að hann verði framseldur til Þýskalands.