10.234 dagar eru síðan Englendingar léku síðast til undanúrslita á HM. Reiknað er með að þjóðlífið muni meira og minna lamast í kvöld og að um 30 milljónir manna muni setjast við sjónvarpið til að horfa á Harry Kane og félaga hans etja kappi við Króata.
Margir mættu í landsliðstreyjum til vinnu eða í skóla í morgun en aðrir eru í happasokkunum sínum, nú eða happanærbuxunum eða happabrjóstahöldurunum. Allt í þeirri von að England vinni leikinn.
Gareth Southgate, þjálfari liðsins, hefur svo sannarlega heillað þjóðina og mikil sala er á vestum á borð við þau sem hann klæðist jafnan á leikdögum. Þá hefur bar verið skírður í höfuð honum sem og neðanjarðarlestarstöð í Lundúnum. Barir verða að sjálfsögðu opnir í kvöld og sýna leikinn en reiknað er með að þeir selji 20 milljónir bjórglasa (pint) í kvöld. Þá eru ótaldir allir þeir sem eru komnir til Moskvu í þeirri von að ná sér í miða á leikinn.
52 ár eru síðan England sigraði í keppninni og því vona margir að nú sé stundin loksins runnin upp á nýjan leik. En fyrst þarf að sigrast á Króötum og síðan Frökkum.