Því miður er það oft fylgifiskur stórra íþróttaviðburða á borð við HM að heimilisofbeldi eykst. Enskar rannsóknir hafa sýnt að þar í landi eykst heimilisofbeldi um 26 prósent þegar England er að spila og um 38 prósent ef England tapar. Margir stuðningsmenn eru kvíðnir fyrir leiki og meðan á þeim stendur. Það sama á stundum við um maka þeirra. Kvíði þeirra og skelfing er vegna þess að konurnar eiga von á að verða beittar ofbeldi á meðan leikir standa yfir og enn grimmara og svæsnara ofbeldi ef illa fer fyrir „liði“ makans.
Sóley Tómasdóttir, fyrrum forseti borgarstjórnar fyrir VG er ein þeirra sem hefur vakið athygli á þessari mikilvægu herferð. Sóley sem nú stundar rannsóknir í jafnréttis- og fjölmenningarmálum í Hollandi og hefur lengi barist fyrir femínískum gildum segir á samskiptamiðlum um herferðina:
„Því er iðulega haldið fram að fótbolti sameini fólk. Ekki er þó allt sem sýnist í þeim efnum. Samkvæmt opinberum tölum eykst heimilisofbeldi um 26% þegar England spilar landsleik í knattspyrnu og 38% þegar England tapar landsleik.“
J Walter Thopmson London hefur útbúið öfluga auglýsingaherferð þar sem sýnt er fram á tengsl knattspyrnuleikja og heimilisofbeldis. Á myndinni sem hér fylgir má sjá blóð á andliti konu. Ekki nóg með það því blóðið myndar eiginlega enska fánann á andliti konunnar.
Einnig voru gerðar álíka auglýsingar fyrir Japan og Sviss þar sem þjóðfánarnir eru felldir á álíka hátt inn á konuandlit. Herferðin verður í gangi í nokkrum löndum, þar á meðal Englandi, Japan og Sviss, þar til HM er lokið.
Þá er rétt að benda á að það eru ekki aðeins makar sem þjást í ofbeldissamböndum. Ef horft er til Íslands hefur verið sýnt fram á að í hverri einustu viku verða fimm til sex börn vitni að því þegar foreldrar beita hvort annað ofbeldi. Um 40 prósent þeirra þurfa á áfallameðferð að halda. Það eru tvö til þrjú börn í viku sem þurfa áfallahjálp vegna þess að þau sjá mömmu sína eða pabba sæta ofbeldi.
