Frelsisstyttan í New York er heimsþekkt og milljónir manna berja hana augum ár hvert. En það eru kannski ekki allir sem vita að hún á sér tvífara, eða því sem næst, í Las Vegas. Tvífarinn komst heldur betur í kastljósið fyrir átta árum vegna mistaka bandarísku póstþjónustunnar. Mistök sem juku frægð tvífarans og urðu póstþjónustunni dýr þegar upp var staðið.

Það var 2010 sem bandaríska póstþjónustan USPS gaf út nýja frímerkjaseríu með nærmynd af andliti Frelsisstytunnar. En þar á bæ hafði fólki yfirsést að myndin, sem var notuð, var nærmynd af andliti tvífarans í Las Vegas.

Það var frímerkjasafnari sem uppgötvaði mistökin og í framhaldinu neyddist póstþjónustan til að játa upp á sig skömmina. Það fylgdi þó sögunni að þeir þrír milljarðar frímerkja, sem prentuð höfðu verið, yrðu ekki innkölluð.

En Robert Davidson, sem bjó tvífarann til, var ekki sáttur við þessa notkun á listaverki hans á frímerki og krafðist bóta fyrir brot á höfundarrétti. Nýlega féll svo dómur í málinu og þarf USPS að greiða Davidson 3,5 milljónir dollara. Það er þó huggun harmi gegn fyrir póstþjónustuna að það er ekki mikið ef miðað er við að myndirnar voru notaðar á þrjá milljarða frímerkja.